रोल्पा । त्रिवेणी गाउँपालिका–७ गाङमा भएको जीप दुर्घटनामा २९ वर्षीया शिक्षिका सीता खड्काको मृत्यु भएको छ। दुर्घटनामा सीताका दुई नाबालक छोराहरू, तीन वर्षका सौरभ वली र १८ महिनाका सुप्रिम वली, गम्भीर घाइते भएका छन्।
दुर्घटनामा जीपमा सवार पाँच जना थिए, जसमा चालक, सहचालक, सीता र उनका दुई छोरा समावेश थिए। दुर्घटना पछि फरार चालक र सहचालकको खोजी भइरहेको प्रहरीले जनाएको छ।
घाइते बालकहरुलाई स्थानीय गैरीगाउँ स्वास्थ्य चौकीमा प्राथमिक उपचार दिइएको थियो। त्यसपछि थप उपचारका लागि उनीहरूलाई रोल्पा जिल्ला अस्पताल रेउघा पठाइएको थियो। यहाँ पनि उपचार सम्भव नभएपछि उनीहरूलाई दाङको घोराहीस्थित राप्ती स्वास्थ्य विज्ञान प्रतिष्ठानमा रिफर गरिएको छ।
सीता पेशाले शिक्षिका थिइन् र गंगादेव गाउँपालिका–२, घोरनेटा निवासी थिइन्।
प्रकाशित मिति : २०८१ माघ २६ गते शनिवार
