काठमाडौं । प्रधानमन्त्री केपी शर्मा ओलीले धुलिखेल अस्पताल परिसरमा निर्माण हुने ट्रमा तथा आकस्मिक केन्द्रको शिलान्यास गर्नुभएको छ। कार्यक्रमको दौरान उहाँले सरकार नयाँ योजनाको थालनी गर्दै पुराना कामहरू पूरा गर्दै अघि बढिरहेको बताउनुभयो।
प्रधानमन्त्री ओलीले विकास क्रमशः अघि बढ्ने भएकाले सरकारको कामको सही मूल्यांकन आवश्यक रहेको बताउनुभयो। उहाँले जलवायु परिवर्तनको विषयमा सतर्क रहनुपर्ने सन्देश पनि दिनुभयो। साथै, जापानलाई नेपालको भरपर्दो मित्र एवं विकास साझेदारका रूपमा वर्णन गर्नुभयो।
स्वास्थ्य तथा जनसङ्ख्यामन्त्री प्रदीप पौडेलले आगामी आर्थिक वर्षको नीति तथा कार्यक्रममा स्वास्थ्य क्षेत्रलाई प्राथमिकता दिएको जानकारी दिनुभयो। उहाँले सरकारी तथा सामुदायिक अस्पताललाई सहयोग गर्ने योजना समावेश गरिएको बताउनुभयो।
कार्यक्रममा धुलिखेल अस्पतालका कार्यकारी निर्देशक प्राडा. रामकण्ठ माकजुले अस्पतालको विकासक्रमलाई उजागर गर्दै ट्रमा तथा आकस्मिक केन्द्र निर्माण समयमै पूरा हुने विश्वास व्यक्त गर्नुभयो। जापान अन्तर्राष्ट्रिय सहयोग नियोग (जाइका) सँगको सहकार्यमा १०० शय्याको ट्रमा केन्द्र निर्माण गर्ने सम्झौता भएको जानकारी गराइयो।
सम्बन्धित निर्माण कम्पनीले ट्रमा केन्द्रको निर्माण २०२७ जुन महिनासम्म सम्पन्न गर्ने लक्ष्य लिएको छ। अत्याधुनिक मेडिकल उपकरणसहितको अस्पताल सञ्चालनमा आएपछि काभ्रेपलाञ्चोक, रामेछाप, दोलखा, सिन्धुपाल्चोक, सिन्धुली, भक्तपुर तथा तराईका जिल्लाका बिरामीहरूले सहज उपचार सेवा पाउनेछन्।
