जनकपुरधाम — मधेस प्रदेश सभा सदस्य किरण कुमारी साह पारिवारिक विवादमा तानिएकी छन्। उनमाथि आफ्ना सासू–ससुरालाई घरबाट निकालेर घरजग्गा कब्जा गरेको आरोप लागिरहेको छ।
सप्तरीको राजविराजस्थित सिराहा रोडमा बस्दै आएका उनका ८० वर्षीय ससुरा देवनारायण प्रसाद साह र सासू शान्तिदेवीले सामाजिक सञ्जालमा भिडियो सन्देश जारी गर्दै बुहारी साह र छोरा इन्जिनियर विनोद साहमाथि शारीरिक र मानसिक दुर्व्यवहार गरेको आरोप लगाएका छन्।
देवनारायणले भनेका छन्, ‘मैले आफ्नो जीवनको सम्पूर्ण मेहनत लगानी गरेर यो घर बनाएको हुँ, तर अहिले बुहारी किरण र छोरा विनोदले मलाई घरबाट निकालिदिए।’ उनले असोज २० गते मन्दिर गएको बेला घरको दराज फोडेर नागरिकता, जग्गा र घरसम्बन्धी कागजात चोरी भएको दाबी पनि गरे।
असोज २२ गते उनले जिल्ला प्रशासन कार्यालय सप्तरीमा औपचारिक उजुरी दर्ता गराएका थिए। कात्तिक २ गते पुनः कुटपिट भएको आरोप पनि उनले छोरा–बुहारीमाथि लगाएका छन्।
किरण कुमारी साहले सबै आरोप निराधार भएको दाबी गरेकी छन्। उनले सामाजिक र राजनीतिक उद्देश्यले पारिवारिक विवादलाई गलत रङ दिइएको बताइन्। उनका अनुसार, साधारण पारिवारिक झगडा चाडपर्वको तयारीका क्रममा भएको थियो, तर अनावश्यक रूपमा ठूलो बनाइएको छ।
सासू–ससुरालाई घरबाट ननिकालेको उनले दाबी गरेकी छन्। बरु, उनीहरू आफैं छोरीको घरमा गएका थिए। कुटपिटको आरोप खण्डन गर्दै उनले भनिन्, ‘मेरो श्रीमानले हातपात गरेको होइन, बरु ससुराले मेरो श्रीमानलाई हातपात गर्न खोज्दा मैले बचाउ गरेकी हुँ।’
जिल्ला प्रशासन कार्यालय सप्तरीले उजुरी दर्ता गरिसकेको छ र प्रहरी प्रशासनले दुवै पक्षलाई छलफलका लागि बोलाउने तयारी गरिरहेको छ।
जसपा र जनमत पार्टीबीचको पुरानो राजनीतिक प्रतिद्वन्द्विता यस घटनामा पनि देखिएको छ। कतिपयले विवाद पारिवारिक मात्र नभई राजनीतिक प्रभावयुक्त भएको तर्क गरेका छन्।
प्रदेशसभा सदस्य किरण साह मधेस राजनीतिमा सक्रिय महिला नेतृ हुन्। विवादले उनको राजनीतिक छविमा असर पार्ने देखिन्छ। स्थानीय प्रशासनले वार्तामार्फत विवाद सुल्झाउने प्रयास गर्दैछ, तर सार्वजनिक अभिव्यक्तिहरूका कारण विवाद चाँडै शान्त हुने सम्भावना देखिँदैन।
