काठमाडौँ। सरकारले गणतन्त्रविरुद्धका गतिविधिमा संलग्न रहेको आरोप लगाउँदै पूर्वराजा ज्ञानेन्द्र शाहलाई पक्राउ गर्न तयारी गरेको छ। प्रधानमन्त्री केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डले यस विषयमा एकै स्वरमा समर्थन जनाएका छन्।
प्रधानमन्त्री ओलीले भारतीय जासुसी संस्थासँगको सम्बन्धको बारेमा पनि सचिवालय बैठकमा चर्चा गरेका थिए। उनले आफूलाई प्रधानमन्त्री पदबाट हटाउन भारतीय तत्व सक्रिय रहेको र पूर्वराजालाई पक्राउ गर्ने सम्भावनाको बारेमा जानकारी दिएका थिए।
बैठकमा ओलीले भने, ‘मलाई पदबाट हटाउन दमकदेखि काठमाडौँसम्म जासूसहरू परिचालित छन्, म यी सबैलाई देखाइदिन्छु।’ उनले संसदमा समसामयिक विषयमा सम्बोधन गर्ने तयारी रहेको समेत बताएका छन्।
यसअघि, माओवादी केन्द्रका अध्यक्ष प्रचण्डले पनि गणतन्त्रविरुद्ध लाग्ने पूर्वराजालाई पक्राउ गर्नु पर्ने बताउँदै आएका छन्। दाहालले राजतन्त्र पुनःस्थापना पक्षधरको आन्दोलनमा विदेशी हस्तक्षेपको बारेमा चिन्ता व्यक्त गरेका थिए।
प्रधानमन्त्री ओली र प्रचण्डले संयुक्त रूपमा पूर्वराजालाई गिरफ्तार गर्ने तयारीको पक्षमा सहमति जनाएका छन्, जसलाई राजनीतिक दृष्टिकोणबाट महत्व दिइएको छ।
