२०८० फाल्गुन १७ गते बिहिवार | 2024 February 29th Thursday

Preeti To Unicode   www.en.janaboli.com      www.pressadda.com

श्रृंखला खतिवडा भन्छिन्, मेरो वास्तविक जीवन यति पूर्ण कहिल्यै भएको छैन

काठमाडौं । पूर्वमिस नेपाल श्रृंखला खतिवडा अमेरिकामा पढाइ सकेर स्वदेश फर्किएकी छन् । हार्वर्ड विश्वविद्यालयमा सहरी योजना विषयमा स्नातकोत्तर सकेकी उनी एक महिनाअघि काठमाडौं फर्किएकी हुन् । जहाँ भए पनि श्रृंखलालाई गसिपले पछ्याउन छाड्दैन । उनको निजी र व्यावसायिक जीवन सधैं लाइमलाइटमा रहने गर्छ ।

नेपाल फर्किएपछि पनि श्रृंखला सामाजिक सञ्जालको केन्द्रमा छिन् । यसबीच शुक्रबार उनले इन्स्टाग्राममा लामो स्टाटस पोस्ट गर्दै आफूलाई लिएर चलिरहेका हल्लालाई खण्डन गर्ने प्रयास गरेकी छन् । उनी लेख्छिन्, ‘यदि मैले मेरो सार्वजनिक भाष्यलाई कथाको आकार दिन सक्दिन भने मलाई कुनै आपत्ति छैन । यसले मलाई मेरो करिअर र मेरो व्यक्तिगत जीवनलाई आकार दिने ठाउँ दिएको छ । मैले मानसिक रूपमा लामो समयअघि छोडेको आफ्नो भर्सनलाई अगाडि बढाउने अवसर पाएकी छु ।

 

उनले यो वाक्यमार्फत पछिल्लो समय आफ्नो निजी गतिविधिलाई लिएर भइरहेका गसिपलाई सम्बोधन गर्ने प्रयास गरेकी छन् । इन्टरनेटमा आइरहने कुराले आफू थकित भएको भन्दै उनले आफ्नो वास्तविक जीवनप्रति कृतज्ञ भएको बताएकी छिन् । उनले मेरो वास्तविक जीवन यति पूर्ण कहिल्यै भएको छैन समेत लेखेकी छिन् ।

श्रृंखला लेख्छिन् :

म ठीक एक महिनाअघि नेपाल फर्किएँ । झोलाहरू प्याक गरें, मेरो दुई वर्षको जीवन र तीन सुटकेसलाई लिएर सिंढीबाट ओर्लिएँ । उडान भर्दै २१ घण्टामा घर फर्किएँ । त्यसरी नै मेरो संसार अचानक त्यहीं फर्कियो जहाँ मैले पहिले छोडेको थिएँ । तर यसपटक मात्र म भिन्न थिएँ ।

त्यहाँ धेरै कुराहरू छन् जुन म तपाईंहरू सबैसँग साझा गर्न चाहन्छु । मेरा मायालु शुभचिन्तक र अनुयायी जसले मलाई अघि बढेको र रोकिएको देखेका छन् । जो सामाजिक सञ्जालमा मविरुद्ध हुने घृणा र बदमासीसँगै मेरो साथमा उभिएका छन् । म यो ठाउँमा स्वतन्त्र हुन चाहन्छु तर दुःखको कुरा आज यो बिन्दु आइपुगेको छ, जहाँ म मेरो आफ्नै कथाको स्वामित्व वा नियन्त्रण गर्न सकिरहेको छैन । इन्टरनेटमा भएका जो कोहीले तपाईंको लागि यो गर्न सक्छन् । म यसबाट थकित छु ।

त्यसैले यो सबै कुरा अहिले बाँड्न चाहन्छु । मेरो गति धेरै शान्त र प्रेम, प्रेरणासँगै अघि बढेको छ । म फर्किने बित्तिकै काममा डुबें । म दैनिक एक कडा दिनचर्या पालना गर्छु । थकित हुँदै १० बजे ओछ्यानमा जान्छु र चाँडै उठ्छु । मेरो वास्तविक जीवन यति पूर्ण कहिल्यै भएको छैन । अफसोस, सामाजिक मिडिया उस्तै भएको छैन । म कृतज्ञ छु कि कम्तीमा म चाहेको बेला यसलाई लगअफ गरेर बन्द गर्न सक्छु । म मेरो वरिपरि भएका मानिसका लागि कृतज्ञ छु, म मेरो अफलाइन जीवन, मेरो वास्तविक जीवनको लागि कृतज्ञ छु ।

यस्तै छ मेरो अहिलेको जीवन । मेरो नजिकको परिवार र साथीहरू । बिहानको पैदल र साँझ पाटन वरिपरि घुम्छु । सम्भावना बोकेको नयाँ सुरुवात । यदि मैले मेरो सार्वजनिक भाष्य (पब्लिक न्यारेटिभ) आकार दिन सक्दिन भने मलाई कुनै आपत्ति छैन । यसले मलाई मेरो करिअर र मेरो व्यक्तिगत जीवनलाई आकार दिने ठाउँ दिएको छ । मैले मानसिक रूपमा लामो समयअघि छोडेको आफ्नो स्वरुपलाई अघि बढाउने अवसर पाएकी छु ।

प्रकाशित मिति : २०८० असार १६ गते शनिवार
प्रतिक्रिया दिनुहोस