काठमाडौं । बागमती प्रदेशका सहकारी तथा गरिबी निवारणमन्त्री मदुकुमार श्रेष्ठका स्वकीय सचिव रवि थापाको सोमबार काठमाडौंको कलंकीस्थित सहिद मेमोरियल अस्पतालमा उपचारका क्रममा निधन भएको छ। धादिङ, धुनीबेसी–९ का ३६ वर्षीय थापाले दिउँसो २ बजे साथीको कोठामा विषादी सेवन गरेका थिए। अचेत अवस्थामा फेला परेपछि उनलाई अस्पताल लगिएकोमा साँझ ६:३८ बजे चिकित्सकले मृत घोषणा गरेका थिए।
प्रहरी परिसर काठमाडौंका एसपी अपिलराज बोहराका अनुसार, थापाले कोठामा कोही नभएको मौका पारेर विषादी खाएका थिए। उनको साथबाट बरामद एक पेजको पत्रमा सहकारीको पैसा लेनदेनमा आफ्नो नाम जोडिएको र बेइज्जत भएको उल्लेख छ। गत आइतबार सार्वजनिक भएको सुमेरु सहकारीसम्बन्धी अडियोमा थापाको नाम मुछिएको प्रहरीले जनाएको छ।
थापा शुक्रबार मन्त्रीसँग काठमाडौं गएका थिए। आइतबार छोरीको जन्मोत्सव मनाएर राति १० बजे कोठाबाट बाहिरिएपछि परिवारको सम्पर्कमा थिएनन्। सुमेरु सहकारीका पूर्वसचिव विनोद आचार्यसँगको अडियोमा उनको संलग्नता देखिएको र उक्त अडियो सम्पादन गरी बदनाम गरिएको थापाको पत्रमा उल्लेख छ। मन्त्री श्रेष्ठले पनि यो दाबी दोहोर्याएका छन्।
सुमेरु सहकारीलाई मन्त्रालयले पुस २८ मा समस्याग्रस्त घोषणा गरेको थियो, जसविरुद्ध सहकारीले सर्वोच्चमा रिट दायर गरी अल्पकालीन आदेश लिएको छ। थापाको शव टिचिङ अस्पतालमा राखिएको छ भने प्रहरी वृत्त कालिमाटीले अनुसन्धान गरिरहेको छ। धादिङ प्रहरीले अडियोमा संलग्न अर्का व्यक्तिलाई सोधपुछपछि छाडेको जनाएको छ।
