अमेरिकास्थित मिशिगनको हल्याण्ड शहरमा बस्ने ३९ वर्षीया केटी ली नामकी महिलामाथि आफ्नो १७ वर्षीय छोरा अस्टिन डीन पिकार्टको हत्या गरेको गम्भीर आरोप लागेको छ। यो घटना फेब्रुअरी २१, २०२५ मा भएको थियो, जुन अस्टिनको १८ औं जन्मदिनको ठीक एक दिनअघि हो। प्रहरीका अनुसार, लीले आफैंले ९११ मा फोन गरेर आफूले छोराको सास रोक्ने प्रयास गरेको र त्यसमा सफल नभएको बताएकी थिइन्। उनले छोराले लागूऔषधको अत्यधिक प्रयोग गरेर आत्महत्या गर्न खोजेको र आफूले उसको इच्छा पूरा गर्न खोजेको दाबी गरेकी छिन्।
स्थानीय प्रहरीले बिहानै लीको अपार्टमेन्टमा शंकास्पद गतिविधिको सूचना पाएपछि घटनास्थलमा पुग्दा उनलाई रगतले लतपतिएको अवस्थामा र चक्कु बोकेको भेटेका थिए। प्रहरीले उनलाई नियन्त्रणमा लिन टेजर प्रयोग गर्नुपरेको थियो। घरभित्र अस्टिनको शव फेला परेको थियो, जसको घाँटी र हातमा चक्कुले गहिरो चोट लागेको पाइयो। प्रारम्भिक अनुसन्धानले यो पनि संकेत गरेको छ कि ली र उनको छोराले आत्महत्याको प्रयासमा औषधिको अत्यधिक प्रयोग गरेका थिए, र त्यसपछि लीले चक्कुले आक्रमण गरेको हुन सक्छ। लीले प्रहरीलाई आफू पनि मर्न चाहेको र छोरासँगै रहन प्रहरीले आफूलाई गोली हानोस् भन्ने अनुरोध गरेको बताइएको छ।
फेब्रुअरी २४, २०२५ मा भएको अदालतको सुनुवाइमा लीले आफूमाथि लागेको खुला हत्या र प्रहरीको काममा अवरोधको आरोपमा दोषी नभएको जिकिर गरिन्। उनले अदालतमा आफूले छोरालाई १८ वर्षको हुनबाट जोगाउन यो कदम चालेको बताएकी थिइन्। यद्यपि, उनको यो दाबीको सत्यता अझै पुष्टि हुन बाँकी छ र अनुसन्धान जारी छ। अदालतले उनको धरौटीको माग अस्वीकार गरेको छ, र उनको अर्को सुनुवाइ मार्च ४, २०२५ मा हुने तय भएको छ। यो घटनाले स्थानीय समुदायमा ठूलो तरंग ल्याएको छ। अस्टिनलाई उनको परिवार र साथीहरूले ‘बिरालो, विज्ञान, भिडियो गेम र माछा मार्ने शौकीन’ को रूपमा सम्झिएका छन्।
प्रकाशित मिति : २०८१ फाल्गुन १५ गते बिहिवार
