२०८३ मङ्सिर ७ गते आइतवार | 2026 November 22nd Sunday

दुर्घटनामा ज्यान गुमाएका बाबु-छोराको एउटै चितामा अन्त्येष्टि

तुलसीपुर, (दाङ), असोज ८ । सल्यानमा तरकारी बोकेको जिप दुर्घटना हुँदा मृत्यु भएका बाबुछोराको एउटै चितामा अन्त्येष्टि गरिएको छ। सोमबार साँझ ६ बजेतिर ग्वारखोलाको चितामा अन्त्येष्टि गरिएको स्थानीय सागर रोकाले बताए।

दुर्घटनामा मृत्यु भएका तुलसीपुर उपमहानगरपालिका–१८ ग्वारखोला टोलका बुबा ५० वर्षीय गणेश बुढा र छोरा २५ वर्षीय भक्तबहादुरको एउटै चितामा अन्त्येष्टि गरिएको हो। दुबै जनाको सल्यान कपुरकोटमा गाउँपालिका–३ चोरखोला नजिकैको सेतापैरामा दुर्घटना हुँदा मृत्यु भएको हो। आफ्नै गाडीमा तरकारी ल्याउँदै गरेको अवस्थामा सोमबार बिहान साढे ६ बजेतिर जिप अनियन्त्रित भई पल्टिँदा घटनास्थलमै उनीहरूको मृत्यु भएको थियो।

छोराले गाडी चलाइरहेका थिए भने बुबा सोही गाडीमा सवार थिए। बाबुछोरा सल्यान, रोल्पा लगायतबाट तरकारी ल्याएर दाङसहित बुटवल, नारायणघट, बाँके लगायतका बजारमा बिक्री गर्दै आएका थिए। उनीहरू पाँच वर्षदेखि यसरी काम गर्दै आएको वडाध्यक्ष माधव वलीले बताए।

‘उहाँहरू लामो समयदेखि छोराले गाडी चलाउने र बुबा सँगै हिँड्ने गर्नुहुन्थ्यो,’ वडाध्यक्ष वलीले भन्नुभयो, ‘रोल्पा, सल्यानबाट तरकारी ल्याएर बेच्ने गर्नुहुन्थ्यो।’ रा १ च १०२५ नम्बरको जिप साढे तीन सय मिटर तल खस्दा टुक्राटुक्रा परेको थियो। सोही दुर्घटनामा तुलसीपुर उपमहानगरपालिका–२ निवासी ३५ वर्षीय नारायण योगी घाइते भएका थिए।

 

प्रकाशित मिति : २०८० असोज ९ गते मङ्गलवार
प्रतिक्रिया दिनुहोस