लोकतान्त्रिक समाजवादी पार्टी नेपालका अध्यक्ष महन्थ ठाकुरले देशविरोधी बयान दिएका छन्। अध्यक्ष ठाकुरले नेपालबाट अलग हुन सक्ने आशय व्यक्त गरेका छन्, जसलाई कतिपयले देशविरोधी बयानको रूपमा लिएका छन्। रातोपाटी अनलाइनसँगको एक कुराकानीमा उनले मधेसवादी दलहरूले सत्तामा रहँदा बिग्रिएको आरोपको खण्डन गर्दै यस्तो अभिव्यक्ति दिएका हुन्।
ठाकुरले व्यक्त गरेका कुरा यस्ता छन्, “के यो देशमाथि हाम्रो हक छैन? हक छैन भने भनिदियोस् न, हामी अलग रहन्छौँ। के हामी राष्ट्रपति, प्रधानमन्त्री, मन्त्री बन्न पाउँदैनौं र? हामी सरकारमा जान पाउँदैनौं र? हामी सत्ताको हकदार होइनौं र?” उनले सत्तामा रहँदाको अनुभवलाई उदाहरण दिँदै कांग्रेस, एमाले र माओवादीलाई सत्तालिप्साको आरोप नलाग्ने तर मधेसवादी दलहरूलाई लाग्ने कारणमा प्रश्न उठाए।
उनले आफ्नो पार्टीबाट केही मन्त्री बने पनि तीनले जनताको सेवा इमानदारीपूर्वक गरेको दाबी गर्दै, सरकारमा रहँदा गरिएका काण्डहरूको जिम्मेवारी मधेसवादी दलमाथि नथोपर्न आग्रह गरे।
अध्यक्ष ठाकुरले मधेसी जनताको नागरिकता र राजनीतिक पहिचानको विषयमा पनि धारणा राखे। उनले नागरिकता प्राप्त गर्नका लागि मधेसीहरूले भोग्नु परेको कठिनाइ र राजनीतिक पहिचानको अभावलाई उल्लेख गर्दै, “ह्वाइ वनली नेपाली वर्ड युज फर गोर्खाली?” भनेर प्रश्न गरे। उनको तर्क थियो कि मधेसीलाई गोर्खाली भन्न नहुने, जसले देशमा असमानता कायमै रहेको देखाउँछ।
साथै, ठाकुरले स्वायत्तताको मागलाई पनि जोड दिए। उनले अधिकार सम्पन्न प्रदेशको माग गर्दै, राज्यले यसलाई डरले नदिएको तर त्यसले अलग हुने जोखिम बढाएको बताए। उनले शान्तिपूर्ण आन्दोलन गर्ने मधेसीहरू जेलमा रहँदा हतियार प्रयोग गरेर आन्दोलन गर्नेहरू शासन गरिरहेको विभेदकारी अवस्थाको चर्चा गर्दै, यस्तो विभेदले कसैलाई फाइदा नगर्ने धारणा राखे।
