काठमाडौं । रास्वपा का सभापति रवि लामिछानको थुनछेक बहस जिल्ला अदालत रुपन्देहीमा जारी छ। बुटवलको सुप्रिम सहकारी ठगी प्रकरणमा बयान दिनका लागि लामिछाने बुधबार अदालतमा उपस्थित भएका थिए। आजबाट उनका थुनछेक बहस सुरु भएका छन्।
यस क्रममा सरकारी वकिलहरूले न्यायाधीश प्रल्हादकुमार योगीमाथि प्रश्न उठाएका छन्, जसका अनुसार लामिछानेलाई परिवारको जिम्मामा छाड्नु र न्यायाधीशको व्यवहार विवादित भएको छ। सरकारी वकिलहरूले “रिक्युजल”को आवश्यकता रहेको बताएका छन्।
पीडित पक्षका वकिल डा. सुरेन्द्र भण्डारी र दिनेश त्रिपाठीले पनि यसलाई समर्थन गरे, जबकि प्रतिवादी पक्षका वकिलहरूले यसको आवश्यकता नभएको बताए। न्यायाधीश योगीले आफू मुद्दाबाट पछि नहट्ने अडान लिँदै थुनछेक बहसलाई अघि बढाए। सरकारी वकिलका तर्फबाट बहस जारी छ।
प्रकाशित मिति : २०८१ माघ १० गते बिहिवार
