काठमाडौं । निर्वाचन आयोगमा राजनीतिक दलहरूले आर्थिक वर्ष २०८०/८१ को आम्दानी र खर्चको विवरण बुझाएका छन्। आयोगका अनुसार, नेकपा (एमाले) सबैभन्दा धनी दल रहेको छ भने, नेपाली कांग्रेस लगातार दुई वर्षदेखि घाटामा रहेको छ।
नेकपा (माओवादी केन्द्र) को आम्दानीमा गिरावट आएको छ भने, राष्ट्रिय स्वतन्त्र पार्टीले आम्दानीको दोब्बर खर्च गर्दा लगभग पौने दुई करोड रुपियाँ घाटामा गएको छ।
राजनीतिक दलसम्बन्धी ऐन, २०७३ अनुसार, प्रत्येक दलले आव समाप्त भएको छ महिनाभित्र आयव्ययको लेखा परीक्षण र निर्वाचन आयोगमा प्रतिवेदन बुझाउनुपर्ने व्यवस्था छ। यस व्यवस्थाअनुसार, माघ महिनाभित्र ८८ दलले लेखा परीक्षण प्रतिवेदन बुझाएका छन्।
आयोगमा बुझाइएको विवरण अनुसार, नेकपा (एमाले) ले गत आर्थिक वर्षमा १४ करोड ७९ लाख रुपियाँ आम्दानी गरेको छ। यो वर्ष एमालेले सात करोड २८ लाख रुपियाँ बचत गरेको छ।
नेकपा (एकीकृत समाजवादी) ले गत आवमा चार करोड २४ लाख रुपियाँ आम्दानी गरेको छ, तर खर्च बढी गरेको छ।
नेपाली कांग्रेस भने दुई करोड ३२ लाख रुपियाँ घाटामा गएको छ। कांग्रेसको आम्दानी मुख्यत: चन्दा र सहयोगबाट आएको हो।
नेकपा (माओवादी केन्द्र) को आम्दानी २०८०/८१ मा घटेर एक करोड ८६ लाख रुपियाँ भएको छ।
राष्ट्रिय स्वतन्त्र पार्टीले आम्दानीको दोब्बर खर्च गरेको छ र करिब एक करोड ६९ लाख रुपियाँ घाटामा गएको छ।
जनमत पार्टीले यस वर्ष सबै सापटी र कर्जा फिर्ता गरेको छ, र एक करोड १८ लाख रुपियाँ आम्दानी गरेको छ। राष्ट्रिय प्रजातन्त्र पार्टीको आम्दानीमा पनि गिरावट आएको छ।
आव २०८०/८१ मा ११५ दल दर्ता भएका मध्ये २७ दलले विवरण बुझाएनन्। गोरखापत्रबाट
