२०८३ मङ्सिर ७ गते आइतवार | 2026 November 22nd Sunday

यो युरोपेली देशमा पुरुष अभाव : महिलाहरूले ‘एक घण्टाको पति’ भाडामा लिन थाले !

काठमाडौं । युरोपेली देश लाटभियामा गम्भीर लिंग असन्तुलन देखिँदा धेरै महिलाहरू घरायसी कामका लागि अस्थायी ‘पति’ भाडामा लिन बाध्य भएका छन्। युरोस्ट्याटका अनुसार लाटभियामा पुरुषको तुलनामा महिलाहरू १५.५ प्रतिशत बढी छन्, जुन युरोपेली संघको औसतभन्दा तीन गुणा बढी हो। ६५ वर्षमाथिको उमेर समूहमा त महिलाहरू पुरुषको तुलनामा झन्डै दोब्बर छन्।

कार्यस्थल र सामाजिक जीवनमा पनि पुरुष अभाव स्पष्ट देखिन्छ। धेरै महिलाहरू साझेदार खोज्न विदेश जान बाध्य बनेको अनुभव सुनाउँछन्। पुरुषको कमीका कारण घरायसी मर्मत र व्यवस्थापनका लागि महिलाहरू कमान्डा२४ र रेमोन्टदर्भी.एलभीजस्ता प्लेटफर्ममार्फत ‘एक घण्टाको पति’ सेवा प्रयोग गर्न थालेका छन्, जहाँ नली जोड्ने, मर्मत, रंग लगाउने र अन्य काम गरिन्छ।

विशेषज्ञहरूले यो असन्तुलनको मुख्य कारण पुरुषहरूको कम औसत आयु भएको बताउँछन्। उच्च धूम्रपान दर, मोटोपन र अस्वस्थ जीवनशैलीका कारण पुरुषहरू चाँडै ज्यान गुमाउने गरेका छन्। तथ्यांकअनुसार ४०.२ प्रतिशत लाटभियन पुरुष धूम्रपान गर्छन्, जबकि महिलामा यो दर १५.८ प्रतिशत मात्र छ।

प्रकाशित मिति : २०८२ मङ्सिर २५ गते बुधवार
प्रतिक्रिया दिनुहोस