अमेरिकी राष्ट्रपति जो बाइडेनले सोमबार वासिङ्टन डीसीमा विदेश नीतिमा आफ्नो अन्तिम भाषण दिँदै चीनको बढ़्दो प्रभावको बाबजुद अमेरिका भविष्यमा सधैं महाशक्ति रहिरहने दाबी गरेका छन्। बाइडेनले भने, “चीनले अमेरिकालाई कहिल्यै उछिन्न सक्दैन। हाम्रो देश विश्वमा महाशक्तिको रूपमा रहिरहनेछ।”
बाइडेनले चीनसँगको सम्बन्धलाई राम्रोसँग व्यवस्थापन गरेको र द्वन्द्वबाट टाढा राख्न सफल भएको बताएका छन्। यससँगै, उनले अफगानिस्तानमा युद्ध अन्त्य गर्ने आफ्नो निर्णयलाई पनि सही ठहराए, र विश्वास व्यक्त गरे कि इतिहासले यसको न्याय गर्नेछ।
त्यसैगरी, उनले रुस–युक्रेन युद्ध, इरानको अवस्थिति र गाजा क्षेत्रमा संघर्षमा पनि आफ्नो सरकारको भूमिका स्पष्ट पारे। उनले युक्रेनमा रुसको प्रयास असफल भएको र इरान आजको दिनमा विगतको भन्दा धेरै कमजोर भएको उल्लेख गरेका छन्।
बाइडेनको भाषणको अन्त्यमा उनले आगामी सरकारलाई कुनै गल्ती नगर्न र अमेरिका सबै चुनौतीहरूको सामना गर्न तयार रहन आग्रह गरे। अमेरिकाका निर्वाचित राष्ट्रपति डोनाल्ड ट्रम्पले यही जनवरी २० देखि कार्यभार सम्हाल्ने छन्। एजेन्सी
