दक्षिण अफ्रिकाको एक सुन खानीमा फसेका १०० भन्दा बढी मजदुरहरूको मृत्यु भएको छ। यी मजदुरहरू २ महिनादेखि खानीमा फसेका थिए र अवैध सुन उत्खनन गर्दै थिए। अल जजिराका अनुसार, ४०० भन्दा बढी मजदुरहरू खानीमा रहेका थिए, र भोक र तिर्खाका कारण उनीहरूको ज्यान गएको हो।
राहत र उद्धारका लागि विशेष खानी उद्धार टोली घटनास्थलमा पठाइएको छ। हालसम्म १३ शवहरू बाहिर निकालिएका छन्, र अन्य मजदुरहरूको उद्धार जारी छ। उद्धार गरिएका कामदारहरूको एक सेलफोनबाट दुई भिडियो प्राप्त गरिएको छ, जसमा दर्जनौं शव पोलिथिनमा बेरिएको देखिन्छ।
माइनिङ इफेक्टेड कम्युनिटीज युनाइटेड इन एक्सन (म्याकुए)का अनुसार, प्रहरीले अवैध उत्खनन रोक्नका लागि खानी सिल गर्न थालेको थियो। पक्राउ पर्ने डरका कारण कामदारहरू खानीबाट बाहिर निस्कन मानेनन्। प्रहरीले खानीको डोरी र पुली हटाइदिँदा यी मजदुर खानीमा अलपत्र परेका थिए।
अखबार सन्डे टाइम्सका अनुसार, उद्धार टोलीले खानीमा ३ किलोमिटर तल झारिने पिंजरा तयार गरेको छ, जसको सहायताले बाँकी रहेका मजदुरहरूको उद्धार गर्न प्रयास भइरहेको छ।
