काठमाडौं। गायक उदित नारायणको एउटा भिडियो सामाजिक सञ्जालमा भाइरल भएको छ, जहाँ उनले आफ्नो लाइभ कन्सर्टमा एक महिला फ्यानलाई ओठमा चुम्बन गरेको देखिन्छ। यस घटनाले उनलाई विवादमा पारेको छ र फ्यानहरूबीच निकै आलोचना भइरहेको छ।
भिडियोमा उदित ‘टिप-टिप बर्षा पानी’ गीत गाउँदै गर्दा केही महिला फ्यानहरू स्टेज नजिक आएको देखिन्छ। उनले एक महिलासँग सेल्फी लिएपछि चुम्बन गरेका छन्। यसपछि उनले बाउन्सरलाई फ्यानहरूलाई स्टेज नजिक आउनबाट नरोक्न भनेका थिए।
विवाद बढेपछि उदितले हिन्दुस्तान टाइम्ससँग कुरा गर्दै यसलाई ‘प्रेमको अभिव्यक्ति’ भनेका छन्। उनले फ्यानहरूको उत्साह र स्टेजमा देखिने पागलपनलाई कारण देखाएका छन्। “फ्यानहरू धेरै क्रेजी हुन्छन् र हामी सभ्य मानिस हौं,” उनले भने, “यो भाइरल हुनु केही होइन।”
तर, उदितको यो स्पष्टीकरणले उनका फ्यानहरूलाई अझ कन्फ्युज बनाएको छ। सामाजिक सञ्जालमा केहीले यसलाई एआई-निर्मित भिडियो भन्दै आलोचना गरेका छन्, जबकि अरूले उदितको व्यवहारप्रति निराशा व्यक्त गरेका छन्।
यो घटनाले उदित नारायणको विगतका विवादहरूलाई पनि सम्झाएको छ, जसमा उनको व्यक्तिगत जीवनका कुराहरू पनि समावेश छन्।
