भारतको कर्नाटक राज्यमा अवस्थित युनेस्को विश्व सम्पदा सूचीमा सूचीकृत हम्पी नजिकै एक भयानक घटनाले विश्व समुदायलाई स्तब्ध बनाएको छ। गत बिहीबारको राति, हम्पीबाट करिब ४ किलोमिटर टाढा सानापुर ताल नजिकै तारा हेर्न गएका पर्यटकहरूमाथि भएको सामूहिक बलात्कारको घटनाले विश्वभर चर्चा पाइरहेको छ। यो घटनामा एक २७ वर्षीया इजरायली पर्यटक र एक २९ वर्षीया भारतीय होमस्टे सञ्चालकमाथि बलात्कार भएको छ भने एक पर्यटकको मृत्यु भएको छ।
प्रहरीका अनुसार, उक्त राति दुई महिला पर्यटकसहित तीन पुरुष पर्यटक (अमेरिकी, महाराष्ट्रका भारतीय र ओडिशाका भारतीय) सानापुर ताल नजिकै थिए। त्यही बेला मोटरसाइकलमा आएका तीन आक्रमणकारीले सुरुमा पेट्रोलको लागि पैसा मागे। पैसा दिन अस्वीकार गरेपछि आक्रमणकारीहरूले हिंसा सुरु गरे। उनीहरूले तीन पुरुष पर्यटकलाई तुङ्गभद्रा नहरमा धकेलेर दुई महिलामाथि सामूहिक बलात्कार गरे। नहरमा धकेलिएकोमा अमेरिकी ड्यानियल र महाराष्ट्रका पंकज तैरिएर बाहिर निस्कन सफल भए, तर ओडिशाका बिबासको डुबेर मृत्यु भयो। उनको शव शनिबार बिहान फेला परेको थियो।
कप्पल प्रहरीले तत्काल कारबाही गर्दै दुई अभियुक्त, २२ वर्षीय मल्लेश र २१ वर्षीय चेतन साइ सिल्लेक्याटरलाई पक्राउ गरेको छ। यी दुवै कप्पल जिल्लाको गंगावती तालुक, साइनगरका बासिन्दा हुन्। तेस्रो अभियुक्तको खोजी जारी छ। प्रहरीले छ विशेष अनुसन्धान टोली परिचालन गरेको छ। फिरौती, लुटपाट, सामूहिक बलात्कार र हत्याको प्रयाससम्बन्धी भारतीय न्याय संहिताअन्तर्गत मुद्दा दर्ता गरेर अनुसन्धान थालिएको छ।
पीडितहरूलाई सरकारी अस्पतालमा उपचार भइरहेको छ र उनीहरूले चाहेमा निजी अस्पतालमा स्थानान्तरण गर्न सकिने व्यवस्था गरिएको छ। कर्नाटकका मुख्यमन्त्री सिद्धारमाइयाले यो घटनालाई जघन्य अपराध भन्दै दोषीमाथि कडा कारबाही र पर्यटकको सुरक्षाको ग्यारेन्टी गर्ने प्रतिबद्धता व्यक्त गरेका छन्। यो घटनाले भारतको पर्यटन छविमा गम्भीर प्रश्न उठाएको छ। हम्पी, जुन आफ्नो ऐतिहासिक र सांस्कृतिक महत्त्वका लागि विश्वप्रसिद्ध छ, यस्तो अपराधको घटनास्थल बन्नुले स्थानीय प्रशासन र सुरक्षा व्यवस्थामाथि पनि आलोचना भएको छ।
प्रकाशित मिति : २०८१ फाल्गुन २५ गते आइतवार
